É a memoria principal do ordenador. Está no interior da caixa e aloxada nos zócalos de memoria.

Os datos da memoria principal organízanse nunha especie de celas numeradas. A cela recibe o nome de posición de memoria, e o seu número de orde denomínase enderezo de memoria. Sabendo a posición de memoria na que está un dato pode localizarse rapidamente.

Cando executamos un programa o primeiro que acontece é que o mandamos á RAM. Alí é onde están os programas mentres traballamos con eles. Ao pechar o programa deixa libre o espazo que ocupaba en memoria.

É un tipo de memoria volátil, é dicir almacena información pero só mentres estea prendida, se apagamos o ordenador todo o seu contido desaparece. Esta é a razón pola que precisamos outro sistema de almacenamento alternativo para gardar datos e poder usalos cando volvamos acender o ordenador, por exemplo un disco duro.